Möminlərin Allaha təslimiyyətləri çox güclüdür

İnsan həyatının hər anı, dediyi hər söz, düşündüyü hər şey, başına gələn hər hadisə, harada və nə vaxt öləcəyi hələ dünyaya gəlməmişdən əvvəl Allah qatında yazılmışdır. İnsan həyatı boyu Allahın onun üçün yazdığını yaşayır. Möminlərə son dərəcə rahatlıq bəxş edən də budur. Başlarına gələn hər şeyi uca Allahın planlaşdırdığını və bunların onlar üçün ən xeyirli olduğunu bilirlər. Buna görə hər zaman Allaha sığınır, Ondan kömək istəyirlər. Uca Allah möminlərin bu güclü təslimiyyətini Quranda belə bildirmişdir:

De: “Allahın bizim üçün yazdığından başqa bizim başımıza heç nə gəlməz. O bizim Himayədarımızdır. Qoy möminlər Allaha təvəkkül etsinlər! (Tövbə surəsi, 51)

Möminlər həmişə Allaha təvəkkül edib, Onun yaratdığı hər şeydən razı olduqları üçün qarşılaşdıqları heç bir hadisədə qorxmur və ya narahat olmurlar. Rəbbimizə təslim olmaları onları hər cür dünyəvi qorxu və sıxıntıdan uzaq tutmaqla yanaşı, həmişə dinc, şən və ümidvar edir.

Möminləri xoşbəxt edən digər səbəb qarşılaşdıqları xoşagəlməz görünən hadisələrin də onlar üçün xeyirli olduğunu bilmələridir. Quran əxlaqını bilməyən bəzi insanlar qarşılaşdıqları çətinliklər qarşısında böyük sıxıntı və narahatlıq keçirir, bunların yükü altında əzilirlər. Allaha təslim olmadıqları üçün bütün bunların onlar üçün xeyirlərə səbəb olacağını düşünmürlər. Xoşagəlməz görünən bir hadisədə Allahın onlar üçün yaratdığı yaxşılığı və xeyri görə bilmirlər. Buna görə ümidsizliyə qapılırlar. Bu, onların əzabını və sıxıntısını daha da artırır.

Möminlər isə nə olursa olsun, uca Allahın onların daima yaxşılığını istədiyini qətiyyən unutmurlar. Onları kədərləndirəcək və ya onlara sıxıntı verəcək hər hansı bir şey olmadığını bilirlər. Çox çətin bir vəziyyətlə qarşılaşsalar da, Allaha yönəlib Ondan kömək istəyərək səbir edirlər. Möminlər üçün bu, xeyirdir. Rahatlıq və bolluq zamanında yenə Allaha yönəlir, şükür edərək Ona yaxınlaşmağa çalışırlar. Möminlərin qədərə bağlılıqları, Allaha olan güclü təslimiyyətləri onları hər zaman xoşbəxt edir, Allahın rizasını qazandırır. Peyğəmbərimiz hz. Muhamməd (səv) də möminlərin bu əxlaqını çox yüksək qiymətləndirmişdir:

“Möminin vəziyyəti necə təəccüblüdür. Hər işi onun üçün xeyirdir. Bu, ancaq möminə xas vəziyyətdir, başqasına deyil. Ona razı qalacağı bir şey gəlsə, şükür edər, bu xeyirdir. Bir zərər gəlsə, səbir edər, bu da xeyirdir.”(Kütüb-i Sitte, Muhtasarı Tərcümə və Şərhi, 2-ci cild, səh. 208)